هل مبيعاتك منخفضة؟ قد تكون تعاني من مشكلة ال Abandon Cart!

الجميع غير راضي عن اداء نتائج مبيعاته بالتأكيد فهذا هو من يدفعنا للأمام لتحسين نشاطنا التجاري وبذل مجهود اكبر في تحليل ما نقوم به لإكتشاف اخطائنا.
لكن انا هنا سوف اتكلم بخصوص مشكلة Abandon Cart وايضاً Product Browsing Abandonment

كلنا عارفين ان funnels دايما بتبقي ماشية بداية من

Home Page -> Categories -> Product -> Cart – > Checkout

كلنا بنفضل نحسب ال conversion من مرحلة للتانية بس دايماً بنبقي مركزين كام واحد وصل لل checkout لان دي بالنسبة لينا hottest lead.

ولو ناس مركزة اوي بنركز علي Cart + Checkout

لأن الناس دي بنقدر نستنبط منها عندها قدرة شرائية, السعر مناسب, ومهتمة بالحاجة الي عملت ليها pickup وبنتمني انهم ياخدو قرار الشراء باسرع وقت ويعملو checkout.

طيب هتعمل ايه لو ال user قرر لسبب ما يدور في اماكن تانية؟

لو فتح تاب جديدة بحيث يشوف منافسين او لاي سبب كان؟

طبعاً الحل الي نكون مستخدمين Facebook pixels وجوجل اناليتيكس في موقعك ومظبط حملاتك مع ال funnels ونعيد استهداف الناس دي بشكل تاني ونعمل كوبونات خصم او عروض وهكذا عشان نزود المبيعات وف الغالب الموضوع بينجح وبتزيد غالباً بنسبة 48% حسب احصائيات من كذا مكان.

طيب تعالو كدا نركز بقي ونشوف الي بيحصل فعلاً مع

• Cart abandonment – التخلي عن سلة المشتريات
• Product Browsing abandonment – التخلي عن المنتج
• Leave/Exit Intent –  النية في المغادة او الخروج

من حوالي 4 سنين كان في ستور ببيع فيه بنظام ال drop shipping سكوتر كهربا وكان اليوزر بتاعي ف امريكا.

المهم اني كنت لا افقه اي حاجة ف التجارة الالكترونية انا واحد مبرمج وعملت ستور وعرضت منتجات حاجة شبه تاجرلي يعني.

انا فضلت اكتر من 3 شهور بعمل اعلانات وفي ترافيك بيجي بدون ولا بيعة واحدة وقتها لا كان في Facebook pixels ولا اعرف ازاي استخدم google analytics وكانت دايماً بتدور في بالي خواطر

ازاي اعرف ان المشتري دا الي دافع فيه دم قلبي وفلوسي

هيكمل للنهاية لل checkout ولا لأ

كل الي ظاهر قدامي ان في ناس بتملي السلة وتمشي

لحد ما قررت اخلي ال cart نفسها اعمل ليها save في الداتابيز

بعد كدا عملت شوية تعديلات بحيث الي يقعد ف صفحة منتج معين اكتر من 45 ثانية احسبه انه مهتم بالمنتج

بعد كدا بقيت احط زي timer ف الباكجراوند بحيث اعمل شوية حسابات ولو اليوزر دا مهتم فعلاً بالمنتج اظهر ليه popup ان في خصم 20%

الي حصل بعد التعديلات دي علي مدار 3 شهور

قدرت احصل علي اول بيعة وكان ربحي فيها 65$ 

المهم علي الهامش انا سقط بسبب الحوار دا سنة ف الكلية  لأني بطلت اذاكر للكلية واذاكر تجارة الكترونية.

وطلعت بمصطلحات

Cart abandonment

وهنا اليوزر ممكن يتخلي عن للسلة ومش يشتري ودورك هنا تعيد استهدافه عشان تزود مبيعاتك

Product Browsing abandonment

وهنا اليوزر ممكن مياخدش قرار انه يشتري المنتج اساساً او يضيفه للسله ودورك انك تشجعه بعرض او خصم او تبرز ليه مميزات فيه.

Leave/Exit Intent

وهنا اقوي مصطلح ودا بيجي معاه علوم كتيرة زي تحليل البيانات والزكاء الاصطناعي عشان نقدر نخلي الانظمة بتاعتنا تتعرف هل المشتري دا هيفقد الرغبة بالشراء ولا لأ وازاي تخليه يرجع تاني يهتم ويكمل عملية الشراء للنهاية.

بص يا باشا الي قولته فوق دا كلام الكتب والي بنطبقه اننا نعمل حملات اعادة استهداف دا كلام بيزود نسبة المبيعات 48% وممكن توصل ل 56% لكن لو حابب تزود مبيعاتك بنسبة 600% تابع الي جاي بقي.

اولاً نقطة انك تستني ان العميل بتاعك يفكر ف غيرك او انه فعلاً يمشي ويسيبك وترجع تعمل حملة تستهدفه دا فلوس زيادة وكمان وقت

المفترض السيستم بتاعك يتعامل بشكل real-time بمجرد ما السيستم يلقط نمط ان العميل دا هيمشي او يفكر في غيري يتم استهدافه يا اما ب SMS او ما يسمي abandonment email campaign او Push Notification

لكن للأسف كل الستارتب وكل الشركات الي بتقدم حلول المتاجر الالكترونية هي بتقدم نظام بسيط يكفي احتياجاتك البسيطة ومبتقدرش تعمل فيه الكلام دا في انظمة وشركات مسؤلة عن النقطة دي زي salecycle لكن للأسف الحلول دي مكلفة جداً يكفي اني اقولك اقل عرض سعر وصلي كان 1500$ ف الشهر وحاجات بسيطة مش كل حاجة.

طبعاً دلوقتي بقي واضح لينا ازاي مبيعات SOUQ and Jumia قوية جداً وغيرهم زي امازون وعلي بابا الشركات دي ضخمة وعندها الانظمة بتاعتها الي بتحلل البيانات وبتقدر تعرف احنا اساساً داخلين وعندنا نية شراء ولا لأ وكمان بتروض العميل لحد ما يبقي عنده نية شراء كل دا بيحصل من خلال اشعارات وعروض وحملات ايميلات.